شكوى وي

شكوى 1: 2403220000881462 شكوى 2: 2403250001814576 شكوى 3: 2403270001713240 شكوى 4: 2403290001286177 صباح/مساء الخير، في سنة ٢٠٢٣، اشتركت في باقة الانترنت المنزلي الجديدة من شركة وي وهي الباقة السنوية بدل الشهرية، عشان مضطرش أدفع الباقة كل شهر. بالفعل دفعت سنة مقدم وخدت ٣٠٠٠ جيجا. بعد أقل من سنة بشهور قليلة (يوم ٢١ فبراير ٢٠٢٤ تقريبا)، خلصت الجيجات، وكان فاضل لي كذا شهر في صلاحية باقتي السنوية، فدخلت ع التطبيق عشان أجدد. لقيت باقة جديدة اسمها جيجا تانك بتقدم ٢٠٠٠ جيجا بسعر ١٢٥٠ جنيه (غير شامل الضريبة). اشتركت في الباقة دي، وبعد شهر بالظبط، النت فصل. لما كلمت خدمة العملا قالولي ان النت فصل عشان صلاحية باقة "جيجا تانك" دي شهر واحد فقط وان الجيجات اللي اشتريتها (٢٠٠٠ جيجا) راحت عليا بانتهاء الشهر ولازم أدفع تاني. أنا دفعت تاني فعلا عشان محتاج النت للشغل، لكن سجلت شكوى فحواها انه مش مكتوب على التطبيق ان باقة "جيجا تانك" الجديدة دي صلاحيتها شهر واحد فقط، وان المشكلة دي بسبب عدم الوضوح من الشركة وان لو المعلومة كانت موضحة بشكل قاطع وصريح، ماكنتش هدفع ١٢٥٠ جنيه (غير شامل الضريبة) في شهر واحد فقط وكنت هشتري باقة أصغر مع العلم ان باقتي أصلا سنوية مش شهرية. الشكوى الاولى اتقفلت من القسم المختص ومحدش كلمني لما دخلت تشات تاني مه خدمة العملا، قالولي الشكوى اقفلت لانه "من المعروف" ان الباقة دي صلاحيتها شهر وان الغلط من عندي. انا أكدت عليهم انه لو كان مكتوب فعلا صلاحية الباقة، كان هيبقى الغلط من عندي، لكن هو مش مكتوب وطلبت فتح شكوى جديدة (لان معندهمش امكانية لفتح نفس الشكوى السابقة) بعدها الشكوى التانية اتقفلت برضه، ولما بعتتلهم في التشات اعرف السبب، بلغوني ان فيه حد حاول يتصل وانا مارديتش، في حين ان ماوصلنيش مكالمة من الشركة. وحتى لو حاولوا يتصلوا، والموبايل كان غير متاح لأي سبب، المفروض يتصلوا بيا مرة تانية. وفي جميع الأحوال، المفروض يكتبوا رد في الشكوى على كلامي بغض النظر عن مكالمة التليفون اللي هما بيدعوا انهم حاولوا يعملوها دي. بعدها فتحت شكوى تالتة وبرضه اتقفلت وفتحت شكوى رابعة وقلتلهم ان لو ما حاولوش يحلوا مشكلتي انا هلجأ للجهاز القومي لتنظيم الاتصالات وحتى يومنا هذا محدش كلمني وانا عارف انهم لو كانوا اتصلوا كانوا هيحاولوا يوضحولي ان الغلط من عندي اني مش عارف ان الباقة صلاحيتها شهر واحد لان لو كانوا فعلا هيرجعولي حقي، كان زمانهم عملوا كده ك رد على شكوتي من غير مايحتاجوا يتصلوا بيا يشرحولي اني مش فاهم. انا طلبي هو تعويض عن تكلفة الباقة اللي راحت عليا ومستعملتهاش دي بسبب خطأ الشركة وعدم كتابة صلاحية الباقة بشكل قاطع انها لمدة شهر واحد فقط (مرة تانية للتأكيد انا باقتي الأساسية سنوية ولو دي ملهاش علاقة فالمفروض يكتبوا على باقة جيجا تانك دي انها شهرية) مش من المنطقي اني اشتري باقة بتقدم ٣٠٠٠ جيجا عشان أستعملها لمدة سنة، وبعدها أشتري باقة جديدة بسعة ٢٠٠٠ جيجا عشان أستعملها لمدة شهر واحد فقط!! باعتذر جدا جدا جدا على الإطالة بس حبيت أوضح كل التفاصيل كل أد ما أقدر.